Eerste semester van 2016

Ek het met die aanvang van hierdie blog rerig gedink ek sal baie meer hierop skryf.  Toe nie.  Sedert ek begin studeer het aan LLB het die tyd verbygevlieg.  Sover is die modules wat ek gedoen het baie interessant en baie meer uitdagend as wat ek gedink het.  Ek sal oor die volgende paar blogs elke module bespreek en wat my ervaringe daarmee saam was.

Om regte te studeer is soos om 'n honeursgraad  te behaal aangesien mens direk na LLB 'n meestersgraad kan behaal.  Ek het nooit daaraan gedink nie, maar dit maak ook nie saak nie.  Ek sien LLB as 'n deur tot 'n nuwe en belonende deel van my beroep.  Al die moeite sal op die ou einde definitief dit werd wees.

Heel eerste moet ek net noem dat die kursus baie meer uitdagend is as wat my BA-graad in kommunikasiewetenskap was.  Dit maak sin, eintlik.  LLB bekwaam mens om oor sake menings te vorm wat ander mense sal gebruik om baie ernstige besluite te neem, of dit nou in die hof is, in die sakewêreld of in die staat.  Kennis van die reg is altyd handig en kan mens amper altyd help.

Hoe benader mens die modules?  So gou as moontlik.  Die beste plan vir my sover was om so gou as moontlik die take af te handel en dan met die leerwerk te begin.  So gou as moontlik beteken vir my dieselfde dag as wat ek vir die vakke geregistreer het.  Met elke semester nog het ek op die eerste dag wat ek kon vir die modules registreer om myself so veel as moontlik kans te gee om dit klaar te maak.  Met die eerste semester van 2016 het dit nie so waffers gewerk nie, maar mens het net een swak taak nodig om mens te motiveer om net soveel beter te doen met die volgende taak.

Hierdie semester sal ek sien hoe ek gevaar het, maar ek weet ek sal baie harder moet werk.

Groete tot 'n volgende keer.

Eerste take op hande

Arbeidsreg se eerste taak moet oormôre (2015-03-12) in wees en die ander drie take Vrydag.  Ek is heeltemal klaar met die arbeidsregtaak en ek moet net bietjie skaaf aan die res.  Dis die eerste bondel van die twintig bondels take wat ek moet inhandig.  Twintig bondels take en tien bondels eksamens.  In totaal is daar 120 akademiese oefeninge wat ek moet doen om my graad te behaal. Dalk is dit makliker om net te dink aan 10 semesters? 2 hierdie jaar klaar, 8 wat oorbly.

Die drie eerstejaarsvakke is heel hanteerbaar.  Ek behoort vir almal onderskeidings te kry. Arrogant? Glad nie. Ek het 'n plan met elkeen van hulle. Hoewel ek nog nie geleer het nie, nie baie intens nie, het ek 'n goeie oorsig van al vier vakke. Harde werk lê nog voor.

Hier waar ek nou sit, het ek vandag my kaptein ingelig dat my oorplasing suksesvol was en dat hy moet bepaal wanneer ek dan by die nuwe plek gaan begin werk.  Gits, waar is my maniere? Ek werk tans by Parkweg Veediefstaleenheid. Dis verwarrend aangesien dit nie by Parkweg self is nie, maar tien kilometer uit die  stad uit.  My verplasing na Parkweg self is toe goedgekeur.  Een van die redes is dat ek net te veel gebiede moet dek.  By Parkweg sal ek waarskynlik net een van die rolle vervul wat ek tans vervul hetsy by finansies of verlowwe of by logistiek.  By finansies behoort ek dan te konsentreer op een aspek van administrasie.  Ek weet dit gaan nie makliker as die huidige posisie wees nie. Dit sal goed wees, want 'n posisie in die regte is nie maklik nie. 

Kom ons kyk wat gaan gebeur. Hopelik sal alles goed uitdraai.

Eerste semester

Laat ek myself voorstel. Ek is Marinus Opperman. Tans is ek werksaam in die SAPD. Ek was gelukkig genoeg om 'n beurs te kry. Sonder die beurs sou dit bietjie moeiliker wees om die graad te behaal, maar dit sou nie onmoontlik wees nie. Elke bietjie help.

Vir semester 1 uit 10 het ek drie eerstjaarsvakke gevat en een derdejaarsvak. Met die graad in kommunikasie het ek Unisa se ritme begin leer. Werkstuk, werkstuk, eksamen of werkstuk, werkstuk, werkstuk.  Eerste werkstukke moet 12 en 13 Maart van 2015 in wees. Dis die volgende Vrydag van vandag af.  Vandag sal ek gebruik om dit klaar te maak.

Die plan is om tien minute per punt te gebruik.  Ek sal met die volgende plasing beskryf hoe dit gewerk het.  Unisa gee mens genoeg tyd, maar as mens dit verspeel, is jou kans daarmee heen. Tans is ek op die rand, maar ek gaan stadig terugtrek en weer op die veilige pad kom.

Groete tot dan!